तस्वीरमा जीवन र जगत

'ह्वेल वाच टुर'का केहि तस्वीरहरु

2012-02-01T02:00:00.000-08:00

शिर्षकले नै बताउँछ त्यसो त यस फोटो ब्लगमा के हुनेछ भनेर फेरिपनि यस पोष्टको बारेमा आफ्नो केहिकुरा

गएको सोमबार हवाईमा हिउँद मनाउन अलास्का देखि ३००० माईलको दुरी पार गरेर आउने ह्वेल माछा हेर्न जाने सल्लाह भएको थियो र एकजना साथीलाई ह्वेल वाच टुरको टिकट लिन भनेको थिएँ । साथीले टिकट लिएर बिहान ७ बजे लाहैना हार्बरमा हाजिर हुनुपर्ने जानकारी गरायो । म बसेको ठाउँबाट ४५ मिनटको ड्राईभमा पर्ने लाहैना पुगेँ समय नबिताई । जब हामी टुर क्रुजमा प्रवेश गर्न तयार भयौं तब थाहा लाग्यो कि हामी त ह्वेल वाच टुरमा नभएर स्नुर्कल टुरमा पो जान लागेका रहेछौं । टिकट फिर्ता गरेर पैसा लिने समय पनि थिएन र हामी स्नुर्कल गर्न तयार/ईच्छित पनि थिएनौं । फसादमा परिसकेका भएपनि पैसा सुलाउन त पर्ने नै भयो ।

पस्यौं क्रुजमा । लगभग ६ घन्टा समयको क्रुजमा आधा समय त स्नुर्कल गर्नेको लागी मात्रै हुने रहेछ । हामी स्नुर्कल नगर्नेलाई राम्रै पट्यार लाग्यो त्यो समय भरी । फेरि पनि आउँदा जाँदा बाटोमा व्हेल या डल्फिनहरु देखिए भने हेर्नलाई मौका चाहिँ मिल्ने रहेछ । टुरको नमज्जा माझ पनि जाँदा आउँदा देखिएका व्हेल र डल्फिनका केहि तस्वीरहरु खिचेको थिएँ मैले र तिनै तस्वीरहरु यहाँ राख्दैछु । खास गरेर ह्वेल वाचकै लागी फेरि कुनैदिन जानुपर्ने धोको राखेर यस टुरमा भने ह्वेलका पुच्छर सम्म खिचेको छु ।

महादेवको विराट मुर्ती

2011-10-13T12:04:00.000-07:00

महादेव : मैले देखे सम्मको महादेवको विराट मुर्ती

किरातेश्वर स्वरुपमा महादेव

सिक्किमको नाम्ची बजार स्थित सोलोखोप भन्ने स्थानमा निर्माणाधिन रहेको शिवको यो भब्य मुर्ती यसपालीको भूकम्पले क्षति पुर्यायो कि ? आज आफ्ना पुराना तस्वीरहरु हेर्दा चिन्ता लाग्यो ।

त्यसै केहि फूलहरु

2011-08-23T15:54:00.000-07:00

जहाँ जसरी होस फुलिरहेको फूलहरु देख्दा त्यसले मन लोभ्याउने गर्छ मलाई र म अनुकुल भएसम्म फूलहरुको तस्वीर खिच्ने गर्छु । गतवर्ष दार्जिलिङ पुग्दा निक्कै तस्वीरहरु मैले आफ्नो क्यामेरामा कैद गरेको थिएँ । ति नै मध्ये केहि फूलहरु यसपटक -

कानापालीको सूर्यास्त र थप केहि तस्वीरहरु

2011-07-19T06:24:00.000-07:00

सुरुवात यहि हवाईको State Flower मानिने चुवा फूलबाट: यो फोटो मैले आफ्नै अर्को ब्लगमा राखिसकेको छु त्यसो त :-

केहि अघि नै हो यो समय कि म Maui Island को Lahaina मा रहेको ठुलो बरको रुख हेर्न पुगेको थिएँ । त्यसदिन चराहरुसंग खिचेका र केहि पानी(समुद्र)मा खिचेका तस्वीरहरु अघिल्ला पोष्टहरुमै राखिसकेको छु । त्यसैदिन खिचेका थप तस्वीरहरुले आज अर्को एउटा पोष्ट बनाउँदैछु -

Lahaina मा थप केहि तस्वीरहरु-

त्यसदिन Lahaina भन्दा अझै अगाडि पर्ने Kanapali भन्ने ठाउँसम्म पुगेको थिएँ । अगाडी कानापालीमा खिचेका तस्वीरहरु-

बाटो काट्छ कि भन्दा नकाटि बसेको भलाद्मी बिरालो, कि अल्छे हो कि?

चर्को घाममा पनि छालहरुसँग लेन्सबाट जिस्कँदै-

बडा मस्तिले बिन्दास दिनभर -

बाटो अनेक देखाउँदै थियो यो रुखले, अबेर भैसके पनि सूर्यास्त हेर्न म लालायित थिएं...

त्यो साँझ कानापालीको समुद्री किनाराबाट देखिएको सूर्यास्तको मनोरम पलहरु-

र अन्त्यमा यो तस्वीर मैले मेरो मूल ब्लगमा राखिसकेको भएपनि -

Haleakala Crater का तस्वीरहरु

2011-07-11T20:23:00.000-07:00

त्यसो त हवाईको मावि टापूमा रहेको यो हालेयाकाला नेशनल पार्क घुम्न म यसभन्दा अघि २००८ को मार्चतिर पनि आएको थिएँ । आएको मात्र हैन यो नेशनल पार्कको तस्वीरहरु खिचेर यहि ब्लगमा राखेको पनि रहेछु । त्यो पोष्ट यहाँ हेर्न सकिन्छ ।

यसपटक फेरि चढेँ हालेयाकाला पर्वतको उकालो र खिचेँ क्रेटर लगायतका निक्कै तस्वीरहरु र ब्लगमा पुन बाड्न राखेको छु । हवाईयन भाषामा नाम राखिएको यो पर्वत हालेयाकालाको अर्थ 'सूर्यको घर' / 'House of the Sun' हुनेरहेछ । यहाँका स्थानियहरुको किंबदन्ति अनुशार demigod Maui भन्ने कुनै पौराणिक(यिनिहरुको पुराण थिएन पक्कै मैले यसै पौराणिक भनिदिएको है!) पात्रले दिन लम्ब्याउनको निम्ती सूर्यलाई बन्धक बनाएका थिए रे यो पर्वतको टुप्पोमा जहाँ ज्वालामुखिको मुख रहेको छ ।

त हेर्नुहोस् पुन एकपटक Haleakala Crater लगायतका तस्वीरहरु-

पानीमा देखिएको जिन्दगानी

2011-06-06T23:51:00.000-07:00

फोटो ब्लगमा यसपटक Maui Island को किनाराबाट पानीमा देखिएको जिन्दगानी खिचेर राखेको छु । तस्वीरहरु कुनैपनि notable नहुन सक्छन् तर आफुले क्यामेरामा कैद गरिसकेपछि यौटा तस्वीरको पनि माया लाग्दोरहेछ । यस्तै त होला मोह भनेको; त्यसैले मैले कतिपय तस्वीरहरु crop गरेर मिलाएर राखेको छु । Watermark भने हतारिएर राख्ने सुरमा बाङ्गोटिङ्गो बस्न गएछ ।

एकैक्षण चराहरुसंग

2011-05-30T14:53:00.000-07:00

Maui Island, Hii को Lahaina मा रहेको यो ठुलो बरको रुखलाई The largest banyan tree in the world भनिएको छ तर भारतको कोलकातामा संसारको सबैभन्दा ठुलो बरको रुख भएको कुरा मैले केहि पहिले इन्टरनेटमा खोज्दा भेटेको थिएँ । जे होस् मैले देखेको सबैभन्दा ठुलो बरको रुख भने यहि हो । यस रुखको बारे र यो रुखभएको ठाउँको बारे अझ जानकारी यहाँ छ । गत हफ्ता मौका पारेर यस रुख मुन्तिर सुस्ताउन आईपुगेको थिएँ म र केहिबेर आफ्नो लेन्सबाट चराहरुसँग जिस्किएको थिएँ र तिनै तस्वीरहरु आज ब्लगको खुराक बनाएको छु ।

एकैक्षण चराहरुसंग रमाउनुस् सक्नुहुन्छ भने -

नयाँ वर्ष २०६८ को शुभकामना !

2011-04-13T10:31:00.000-07:00

नियमित हुन नसकेको भएतापनि मेरो फोटो ब्लग मार्फत यहाँहरु सबैलाई नयाँ वर्ष २०६८ सालको हार्दिक मंगलमय शुभकामना ब्यक्त गर्दछु ।

यो वर्ष सबैको जिन्दगीमा खुसीयालि छावोस् । शुभकामना !!!

शान्ति सौंदर्य

2010-12-23T16:50:00.000-08:00

यसपटक फोटो ब्लगमा गुम्बाहरुको सौम्य वातावरणलाई 'शान्ति सौंदर्य' नाम दिँदै समेटेको छु । यहाँ तस्वीरमा देखिएको जस्तो पवित्र स्थलहरुमा पुग्दा मलाई अनौठो शान्तिको अनुभुति हुन्छ । त्यस्तो अनुभुति नगर्ने मान्छे सायदै होलान् । एक वर्ष अगाडी खिचिएका ई सबै तस्वीरहरु सर्वत्र शान्तिको चाहना राख्नेहरुलाई समर्पण मेरो फोटो ब्लग मार्फत ।

सुरुवात स्वयंभूको दुई तस्वीरहरुबाट -

नाम्चीबजार सिक्किममा अवस्थित बुद्धको विशाल प्रतिमा सहितको 'सेङद्रोप्चे' गुम्बाका तस्वीरहरु-

दार्जेलिङमा अवस्थित महांकाल मन्दिरको तस्वीरहरु-

भुटानको फुन्चेलिङ्ग बजार स्थित गुम्बाका केहि तस्वीरहरु-

फूलहरु मुस्कुराएको बेला

2010-12-16T14:12:00.000-08:00

सायदै कसैलाई सोध्नु पर्ला कि 'ए तिमीलाई फूल मनपर्छ?' भनेर ।

निसंदेह फूल सबैलाई मनपर्छ तर पनि हामीलाई यो चैं फूल उस्तो मन पर्दैन अथवा यो भन्दा त्यो फूल चैं बड्ता मनपर्छ भन्ने कहिंकतै लागेको हुन्छ । त्यसैले त कतिपय अवस्थामा कविहरु फूलमा पनि रेट्ने धार देख्ने गर्छन् र फूलको धारले रेटेको कुरा गर्छन् । मलाई भने वनस्पती फूलेको र मानिस मुस्कुराएको उस्तै प्रिय लाग्छ । यहाँसम्म कि आम मानिसहरुले फूलको दर्जामै नराखेर 'बुङ्गो' नाम दिइएको केराको फूललाई पनि मैले अन्य फूलहरुसँग मिसाएर राखेको छु । तपाईंलाई केराको 'बुङ्गो' फूलहरु भित्र पर्छ जस्तो लाग्छ कि लाग्दैन भन्नुहोस् है ?

यसपटकको ब्लगमा भएका यि सबै फूलहरु सिक्किमको दराम्दिन र नाम्चीमा झण्डै एक वर्ष अगाडी पुग्दा खिचेको हुँ ।

केटाकेटीहरुको तस्वीर

2010-12-08T07:47:00.000-08:00

फोटो खिच्ने रुचि त छँदैछ त्यसमा पनि मैले फूलहरुको फोटो धेरै खिच्ने गरेको रहेछु । किन हो फूलहरुको फोटो खिच्दा मलाई आनन्द लाग्छ । र त्यत्तिकै आनन्द साना केटाकेटीहरुको फोटो खिच्दा पनि लाग्ने गर्छ । यसपटकको ब्लगमा मैले केटाकेटीहरुको केहि फोटोहरु नै देखाउन ल्याएको छु । हेर्नुहोस् है त तपाईंलाई कस्तो लाग्छ ?

कुशल गौली - एँकरेज, अलास्कामा खिचेको फोटोहरु

ऋतु छञ्त्याल - एँकरेज, अलास्कामा खिचेको फोटोहरु

विपासना तामाङ - एंकरेज अलास्कामा

दीञ्जु कार्की - क्रमश दार्जीलिङ्ग सिलिगुरी र ईलाममा खिचेको फोटोहरु

हिमाली ग्लोर - एंकरेज, अलास्कामा

लक्ष्य कार्की - बागडोग्रा, पश्चिम बङ्गालमा खिचेको फोटो

उत्सव लामा - एँकरेज, अलास्कामा

उज्वल लामा - एंकरेज, अलास्कामा शैलेन्द्र राज जोशीले खिचेको फोटो

रोहित तामाङ - एंकरेज, अलास्कामा खिचेको फोटो

साहसी गोर्खालीको रोवमा देखिएका ई फुच्चेको फोटो मैले दार्जीलिङ्गको चियाबारीमा खिचेको हुँ । यिनको नाम थाहा भएन

र अन्त्यमा, अलास्कामै खिचेको यो तस्विरकि नानीको नाम पनि थाहा भएन

अमेरिकी सेनाको हवाई प्रदर्शनी

2010-11-29T11:48:00.000-08:00

झण्डै चार महिना अगाडी अलास्काको एल्मेन्डोर्फ क्याम्पमा अमेरिकी सेनाको हवाई प्रदर्शनी हेर्न पुगेको बेला केहि तस्विरहरु खिचेको थिएं । त्यसबेलै फोटो ब्लग मार्फत ई तस्विरहरु बाँड्ने विचार पनि गरेको थिएँ तर विचार आजसम्म विचाराधिन मात्रै रहन गएको थियो । चार महिना पछि बल्ल आज भने विचारले मुर्त रुप लियो र ई तस्विरहरु ब्लगमा ठेल्दैछु-

अत्याधिक खर्चिलो मानिएको लडाकु विमान F-22, झण्डै २५० मिलियन डलर खर्च गर्दा एक पिस बन्ने रहेछ यो विमान

बडेमानको कार्गो विमान C-17 । त्यसबेला हवाई प्रदर्शनीको अभ्यास गर्दा यस्तै C17 नामको डरलाग्दो कार्गो विमान दुर्घटना भएर चारजना सेनाहरु मरेका थिए

प्रदर्शनीमा राखिएका अन्य विमानहरु

युद्ध अभ्यासको प्रदर्शन

प्रदर्शनीमा बम वर्षा

एकल हवाई कला देखाउन तयार हुँदै एक पाईलट

सेनाको हवाई कला हेर्दै दर्शकहरु

हवाई प्रदर्शनी/कलाका केहि तस्विरहरु

र अन्त्यमा ड्युटीमा गफिंदै एकजोडी

ई मध्ये केहि तस्विरहरु मैले ईकान्तिपुरलाई पठाएको थिएं तर सायद जस्कोतस्को तस्विर उनिहरु राख्दैनन् होला, राखिएन ।

धेरै पछि केहि तस्वीरहरु

2010-11-22T23:56:00.000-08:00

लामो समय देखि ब्लगमा कुनै गतिविधी नगरी बसिरहेको मलाई अझै पनि आफ्नो मूल ब्लगमा केहि लेख्ने खुराक नै नभेटेको झैं भैरहेछ । आज यता फोटो ब्लगमा भने केहि फोटोहरु राख्ने ईच्छा भएर आयो । तसर्थ बिभिन्न समयमा खिचेका केहि फोटोहरु लिएर आएको छु । ब्लग जगतको मोहबाट टाढा भैसकेको छैन भन्ने प्रमाण हो कि त यो ?

छोरीसँग छुट्टीमा घुम्न जाँदा

2010-05-29T19:05:00.000-07:00

फोटो ब्लगमा फोटोहरु नराखेको निक्कै भएछ तर फोटो खिच्ने रुचि भने अझै उस्तै नै छ म भित्र । फलस्वरुप यसपटक घर गएको बेला छोरीलाई घुमाउन जलपाईगुरी अवस्थित जल्धापाडा नेशनल पार्क गएको बेला खिचेका केहि तस्विरहरु लिएर आएको छु -

मसँग त्यसदिन:मेरी छोरी, भाञ्जा, भाञ्जी र आमा

रंग फेर्न नभ्याउँदै छेपारो

सिमलझैं देखिने(मैले यो रुख के थियो चिन्न सकिँन)रुखको फूल

कठोर कि कोमल यो अटल रुखको जीवन?

बाछोको यो अबोधपनामा संसार कति सुन्दर होला?

कैदि बाघहरु

छोरी बाख्राको पाठोसँग खेल्दै

गर्मी, पानी र बच्चाहरु

बचेराको निम्ती चारो बोक्दै धोवीचरा

टोड्को-रुखको दुख

फूलको मिठो रंग

बच्चा माउते र बच्चा हात्ती

घुमीघुमी नाचेर हामीलाई मनोरञ्जन दिने कैदि मयुर

एकजोडी सेतो फूल

नेशनल पार्कमा कैद हरिण

साँझ धर्तीमा ओर्लंदै

मदारीहाट, जलपाईगुरी स्थित आदिकवि भानुभक्तको पूर्णकदको शालिक । दार्जिलिङको चौरस्तामा अवस्थित आदिकविको शालिकको धेरै चर्चा सुनेझैं यो शालिकको मैले कहिल्यै चर्चा सुनेको थिईनं । यो भेगमा जनसंख्याको ४० प्रतिशत नेपालीहरु रहेका रहेछन् ।
जाँगर र समय मिलुञ्जेल छोरीसँग घुम्दाका अरुपनि फोटोहरु राख्दै जानेछु क्रमश.......

House of Taga, Tinian का केहि तस्वीरहरु

2010-01-10T19:59:00.000-08:00

गत (वर्ष) नोभेम्बरमा नर्दन मारियाना आईल्याण्डस तिर गएको बेला निक्कै फोटोहरु खिचेको थिएँ मैले तिहरु मध्ये केहि पहिले नै ब्लग(फोटो)मा राखिसकेको छु र निक्कै नै राख्न बाँकी छन् । यसपटक पनि ति नै मध्ये टिनियान टापूको टागा हाउस भनिने स्थानका केहि र सुर्यास्तका केहि तस्वीरहरु राख्दैछु ।

टागा हाउस वरपरका अन्य केहि तस्विरहरु -

सुर्यास्त हुन लागेको समयका केहि मनमोहक तस्विरहरु -

बनावटी फूलहरु

2010-01-07T15:13:00.000-08:00

फूलहरु मन नपराउने मान्छे मैले भेटेको छैन । सबैले नै मन पराउंछन तर फूल नै पनि बनावटी छ भने त्यसलाई कमैले मन पराउंछन । मलाई नै पनि कागज वा प्लाष्टिकका फूलहरु मनपर्दैनन् । तिनिहरुमा सुन्दरता भएर पनि त्यो कृतिम सुन्दरता हो भन्ने ज्ञात भएर होला बनावटी फूलहरु मन नपरेको । तर हिँजो प्लाष्टिककै फूलहरुको फोटो खिचेको थिएँ । फोटोमा भने मलाई ति फूलहरु मनपरे । अब यसलाई फोटो मनपरेको भन्ने कि फूल ? जे होस त्यही फूलहरु आज यहाँ बाँड्न ल्याएको छु ।

पहिले नै खिचिएका केहि तस्वीरहरु

2010-01-03T15:44:00.000-08:00

केहि पहिले नै खिचेका केहि तस्वीरहरु यसपटक फोटो ब्लगमा लिएर आएको छु । खासमा New Year को फोटो ब्लग राख्ने योजना भुसुक्क भएपछि त्यसको शट्टा योजनामा केहिदिन पछि नै भएपनि यो पोष्ट आएको हो । त्यसैले सन २०१० वर्षभरीको मंगलमय शुभकामना !!

बुद्धको आकाश शान्ती - बोन्जाई क्लिफ, साईपनमा

सन्ततीको निमित्त संघर्ष - टिनियान टापूमा

खान नमिल्ने फल लागेको जंगली बुटो - अलास्कामा

शिरिष फुलिसकेपछि - टिनियान टापूमा

एक साँझ - अलास्कामा

A mirror of nature - अलास्कामा

A view of Taga Beach - टिनियान टापूमा

समुद्री किनारमा रात ओर्लंदै - अलास्कामा

साँझसम्म कुराएर प्रेमिका नआउँदा A lover - अलास्कामा

हे भक्तजन!हामी केरा खाँदैनौं - एंकरेजको हिन्दु मन्दिरमा

खुसीहरु केहि झर्दैछन्, केहि फुलेका छन्, केहि फूल्दैछन् - टिनियान टापूमा

बग्नु, बगीरहनु झरनाको नियति - अलास्कामा

प्रसव वेदनापछि केराको बोट - टिनियान टापूमा

रमाउनलाई मलाई हेरे काफि छ: पहाडी खोला - अलास्कामा

यौटा रमाईलो साँझ - टिनियान टापूमा

The beauty of blow hole - टिनियान टापूमा

तीन अलग पदार्थहरुको एकै लय : चट्टान , समुद्री छाल र बादल - टिनियान टापूमा

मैले देखेको सबैभन्दा ठुलो फर्सी : तौल लेखिएको छ - पाल्मार अलास्कामा

समुद्री किनारको जंगल - Chullu Beach टिनियान टापू

बाल उमङ्ग - अलास्कामा(तस्विरमा कुशल गौली)

स्विमिङ पूल Dynasty Hotel - टिनियान टापूमा

कला केमा हुँदैन? खाना पकाउँदा भाँडाभित्र व्हिप क्रिममा हटसस मिसाउँदा

कोहि निकालिदेउ मलाई यो स्ट्रोलरबाट - मिररलेक picnic पार्टीमा(तस्विरमा विपासना तामाङ)

म देख्दिंन/बोल्दिनं आनन्दै छ - फ्लागिस्टाफ एरिजोनामा

उभिन त सक्छु नि तर सहारा भने चाहिन्छ - तस्विरमा ऋतु छन्त्याल/होमर अलास्कामा

Wonderful time! - तस्विरमा सलिना छन्त्याल/होमर अलास्कामा

"छुट्टिन्छ है छाँया वस्तु अन्सार..." हैन रहेछ, छाँया त समय अन्सार पो हुँदो रहेछ । मेरो आफ्नै छाँया

खानेकुराको खोजीमा - अलास्कामा

रमाईलो छैन र? - साईपन टापूमा

कायाक गर्दाको थकाई मार्ने छाप्रो - साईपन टापूमा

टनलभित्र पस्दै यात्रुबाहक रेल - अलास्कामा

टनलबाट निस्कंदै उहि रेल - अलास्कामै

हिल्टन होटल - एंकरेज डाउनटाउनमा

सूर्यास्त : अलास्कामा

टिनियान टापूका फूलहरु

2009-11-15T16:30:00.000-08:00

निक्कै नै भयो मैले ब्लगमा केहि गतिविधी नगरी निष्कृय बसेको । यतिबेला आफ्नो मूल ब्लग, 'मेरो साहित्य संसार र विविध'मा समेत केहि लेख्न सकिरहेको छैन । लेख्नुपर्ने कुराहरु हुँदाहुँदै पनि निष्कृय रहनुपर्ने यो अवस्थाको चाँडै नै अन्त्य हुने विश्वास छ । सम्भवत अगाडी एक सातासम्म म केहि लेख्न सक्दिन । आज यता, यो फोटो ब्लगमा भने बरु केहि तस्विरहरु लिएर आएको छु । यतिबेला म नर्दन मारियाना आईल्याण्डको टिनियान टापूमा छु र त्यही टापूमा खिचेका केहि फूलहरुको तस्विरहरु पस्किंदैछु यस पोष्टमा । अन्य पनि निक्कै तस्विरहरु खिचेको छु त्यसो त र समय र साधनले साथ दिएसम्म सबै राख्ने नै छु । अहिलेलाई फूलहरुको सौंदर्य यहाँहरुलाई समर्पण गर्दछु -

प्रिय मौसमको प्रिय पल

2009-09-29T16:24:00.001-07:00

आउने सबै कुराहरु जान्छन् - यो सत्य हो । दशैं आयो भन्दैथिए सबै म दशैं गयो भन्थें नभन्दै गयो दशैं । त्यस्तै यो पतझड सिजन यतिखेर बनपाखा सबै पँहेलपुर बनाएर आएको छ तर अलास्कामा ज्यादै अल्प आयू लिएर आउने पतझड अर्को हप्ता सम्ममा लगभग जानेछ । अत दशैं उत्सव मनाईसकेर उब्रिएको समय केहि रमाईला तस्विरहरु खिच्न भनेर म निस्किएँ camera बोकेर -

पतझड मौसमलाई रोक्न सकिन्न तर तस्विरमा कैद गरेर राख्न यो तस्विरबाट सुरु गरें । छैन त सुन्दर ?

लाग्यो म स्वर्गको एक टुक्रामा उभिएको छु

कास ! यो सुन्दरतालाई सँधैको निम्ती जोगाईराख्न सके

आफ्नै धूनमा मस्त म तस्विर खिच्दै गर्दा साथीले मेरो पनि खिचेछ लौ

आफैं बोलुन क्रमश यो ३ वटा तस्विरहरु -

सूर्य लुक्दै छन् पारी डाँडामा । अब दर्शन पाउन नै मुश्किल हुन्छ सूर्य नारायणको

यो अर्को यौटा आफुलाई मन परेको तस्विर

अनौठो कल्पना खेल्ने कोठा : बादलको सिलिङ हालेको आकाशको छानो र चारैतिर पहाडको भित्ता

पत्थरमा पनि सौंदर्यको कमि कहाँ हुन्छ र?

यो पहाडको फेदैफेद छ सिवर्ड हाई वे

यो तस्विर खिचेर हेर्दा यौटा सुन्दर कविता लेख्दा जत्तिकै आनन्द लाग्यो भनेर फेसबूकमा हल्ला गरिसकेको छु ।

जाँदैछ पतझड आउँदैछ हिउँ ।

र अन्त्यमा यो ताजा हिउँ एकदुई दिन अघि मात्र परेको । अब Summer र अल्पायूको पतझड सिजन गएपछि यहि हिउँले राज गर्नेछ अलास्कामा । रुखबिरुवा , खोलानाला , बाटोघाटो , जँगल पर्वत मात्र हैन समुद्रलाई समेत हिममय बनाईदिनेछ ।

शुभकामना !

2009-09-25T00:40:00.000-07:00

बडा दशैं २०६६ को शुभ अवसरमा यस फोटो ब्लग मार्फत सम्पुर्ण मित्रजन हरुमा मेरो हार्दिक मंगलमय शुभकामना !

साथमा यहि बडा दशैंको उपलक्ष्यमा केहि फूलहरुको सौंदर्य पस्किएको छु -

सम्पुर्ण तस्विरहरु गत सेप्टेम्बर ७ तारिखका दिन पाल्मर, अलास्कामा भएको स्टेट फेयरमा खिचेको हुँ - जहाँ पूष्प प्रदर्शनी पनि थियो ।

ह्याचर पासमा कविता खोज्दा

2009-09-11T01:14:00.000-07:00

गत जुलाई १२ मा रहेछ Hatcher Pass घुम्न गएको , घुम्न के हिंड्न भनुँ न । Hatcher Pass अलास्काको यौटा रमणीय ठाउँ मानिन्छ । यहाँको रमणीयता हेर्न साथै Gold Mining हेर्न आउने गर्छन् प्रसस्तै मान्छेहरु ।

त्यो पारीपट्टी देखिएका स-साना झुप्रे घरमा सुन केलाउने काम गरिन्छ । प्रसोधन पनि हुन्छ कि त्यो चैं हेर्न नगै भन्न सकिन्न -

तर आफु भने सुन चाँदी र ढुङ्गा माटो उस्तै देख्ने मान्छे परियो त्यसैले 'Gold Mining पछि हेरौला आज यो रमाईलो दिनमा भने पाखा पखेराको मजा लुटौं ,कतै कविता भेटीहालिन्छ कि ?' भन्ने टुङ्गो गरियो र लागियो भीर पाखातिर । साथमा थिए भाइहरु हर्क(सेतो शर्ट) र सुदेश(कालो ज्याकेट) -

हो मलाई यो हिमनदीको पानी जस्तै कञ्चन कविता चाहिएको छ -

म साँच्चै कविता खोज्ने धूनमै थिएँ त त्यसदिन ? 'कतै यो ढुङ्गाको चेपमा त छैन कविता ?'-

कि यो मखमली गलैंचा बिच्छ्याए जस्तो भुईंमा छ हँ कविता ? -

मैलेमात्र हैन साथै गएका भाइहरुले पनि कुनाकानी खोज्न सघाए कविता -

के मात्र गरिएन ? दिउँसै आगो बालेर पनि खोजियो कविता -

आफु खाली खुट्टा कविता खोज्न गा'बेला चप्पल आनन्द सुतेछ यो फूल बिच्छ्याएको गलैंचा जस्तो भुईँमा -

कसैगरे कविता नभेटे'सी मुख धोएर ज्ञान लिन मन लाग्यो -

'म त जान्न हौ आज घर पनि , यतै बस्छु' भनेझैं छ सुदेश भाइ -

कविता खोज्दा 'पहाड खनेर मुसो निक्लियो' भन्ने हिन्दीको उखानझैं यौटा मुसो पनि निस्किएको थियो -

बरु त यि दुई बनफूलहरुले पो सुनाए कविता यसरी -

दश मुजा पारेर अनुहारमा
कविता खोज्ने ए मान्छे तिमी
भन्लाउ म कविताकै खोजीमा बाँचेको छु ।
ल हेर यहाँ बरु मलाई
पछिल्तिर भयानक मृत्युगुफा राखेर
खित्खिताईकन म भीर पखेरा हाँसेको छु ।।

हो त , यि पोहोर सालकै फोटोहरु हुन्

2009-08-26T15:22:00.000-07:00

'सोचे जसरी चल्न मुश्किल भएको बखत सोचे जसरी चलाउन झन मुश्किल हुने रहेछ गाँठे !' नत्र ता मैले फोटो ब्लगलाई पनि आफुले खिचेका फोटोहरु बखत बखतमा राखेर नियमित बनाउने एक प्रकारको प्रण नै गरेको थिएँ भलै फोटोग्राफीमा मैले कहिल्यै कुनै प्रशिक्षण लिएको थिएन/छैन तर पनि सोखले फोटोहरु भने खिचिरहने गर्छु । थुप्रै फोटोहरु ब्लगमा राख्छु भन्दाभन्दै त्यसै छोडिएका छन् । उता आफुले आफ्नो ब्लगहरुको मुलघर मानेको मेरो साहित्य संसार र विविध भित्र पनि नियमित हुन चाहँदाचाहँदै त्यस्तै भैरहेको छ ।

जे होस् यसपटक मैले वर्षदिन अघि अलास्का आउँदाको पहिलो समरका बेला खिचेका केहि तस्विरहरु लिएर आएको छु । अघि बढौं सुन्दर अलास्काको यो तस्विर : हिमाल,पहाड र समुद्र(त्यो पनि आधाउधी जमेको)बाट -

आलियास्का रिसोर्ट

यो रिसोर्टको तल बाट माथी देखिएको दृश्य -

रिसोर्टको माथी टुप्पाबाट तल देखिने दृश्य -

यहाँ हाम्रो मनकामना मन्दिरमा जाने जस्तै केबुल कार पनि रहेछ ।

यहाँ चैं यस्लाई ट्राम भन्छन् -

हुनत यो निक्कै नै ठुलो हुन्छ एक पटकमा लगभग ३० भन्दा धेरै मान्छे अटाउने त्यसैलाई यस्लाई त केबुल बस पो भन्ने कि ?

यो डाँडोको टुप्पोमा भएको राउण्ड हाउस भनिने सानो संग्राहलय -

राउण्डहाउस भित्र देख्न पाइने चिजबिज मध्ये मैले यि २ मात्र खिचेछु : यो हिउँ परेका बखत यहाँका हस्की जातका कुकुरहरुलाई आफु बसेर तान्न लगाउने कुकुर रथ भनुँ ?

यो चैं अलास्काको पहरामा सुन खोज्न प्रयोग गरिने सर्दाम भनुँ -

त्यसैबेला नजिकैको यौटा सानो बन्यजन्तु आरक्षणमा पनि पुगेर फोटोहरु खिचेको थिएँ -

र अन्त्यमा जाँदा आउँदा बाटोमा खिचेका दुई तस्विरहरु -

होमर यात्रामा देखिएको सुन्दरता

2009-07-06T16:21:00.000-07:00

यसपाली जुलाई चारको छुट्टी मनाउन होमर गईयो । एँकरेजबाट लगभग ५ घण्टा ड्राईभमा रहेको सुन्दर बस्ती होमर जाँदा आउँदा प्रसस्तै फोटोहरु खिचेको भए पनि हामी घुम्नजानेहरुकै फोटोहरु रहेछन् धेरै जस्तो । हामीहरु नभएको केहि फोटोहरु छानेर यहाँ राखेको छु ।

अरुको Camera बाट केहि तस्विरहरु

2009-06-18T01:36:00.000-07:00

तरोताजा समाचारहरु पस्किएर हामीलाई भुत्तुक्कै पार्ने नेपाली भाषाको पहिलो ब्लग ( मैले त नेपाली राष्ट्रिय ब्लग भनेरै घोषणा गरेको हुँ ) माइसंसार मार्फत परिचित साथी लुनाले केहिदिन अघि ईमेल मार्फत केहि तस्विरहरु बाँड्नुभएको थियो । ति नै मध्येका केहि राम्रो लागेर ; वहाँसँग अनुमति मागेर यता ब्लगमा देखाउन ल्याएको छु । हेरौं बिभिन्न ब्लगहरुमा कमेण्ट लेखेर हामी मध्ये धेरै माझ चिनिनुहुने लुनाजीको Camera बाट केहि तस्विरहरु -

र अन्त्यमा यि तस्विरहरु पठाउनुहुने लुनाजी , वेल्जियमबाट

यस फोटो ब्लगमा तस्विरहरु राख्न अनुमति दिनुभएकोमा लुनाजीलाई सहस्र धन्यवाद !

वरिपरीका केहि तस्विरहरु

2009-06-13T00:01:00.000-07:00

हिँजो साँझपख ( रात नै भन्नुपर्ला त्यसो त रातीको ११ बजेतिर हो तर यो ठाउँमा राती ११.३० सम्म घाम अस्ताएकै नहुने आजभोली त्यसैले साँझ भन्देको ) क्यामेरा बोकेर बाहिर निस्केको थिएँ । समुन्द्रको किनार , जँगल (एयरपोर्टछेउ) तिर पुगेर केहि फोटोहरु खिचेको थिएँ । ति नै लिएर आएको छु तपाईंहरुलाई देखाउन ।

सबैभन्दा पहिले केहि जँगली फूलहरुको सुन्दरता हेरौं ।

घर रोपुवा ( जनावर भए पालुवा हुन्थ्यो बनस्पतिलाई रोपुवा भन्दा हुन्छ होला नि ? ) नै हो क्यारे यो चैं फूल त तर जँगल तिर फूल्दा अझैं राम्रो लाग्दो रहेछ हेर्नलाई ।

यो चैं त पक्का जँगली फूल हो है

सुन्दरता फुलेको , फक्रिएको फूलमा मात्रै कहाँ हुने हो र ? ल हेर्नुस् न यो फुलिसकेर सुकेको फूल पनि कति सुन्दर !

Moose साह्रै प्रसिद्द अलास्कामा । बाटोबाटै डुल्दै गरेको भेटिने । यसैलाई हेर्ने पनि धोको हुन्छ यहाँ घुम्न आउनेहरुको । मैले पनि बाटोमै चर्दै गरेको बच्चो Moose भेटेँ र त्यस्को केहि तस्विरहरु पनि खिचेँ ।

बाटोमै रोकिएर Moose को फोटो खिच्दै गर्दा प्लेन आयो टाउको माथी हतार त्यस्को पनि खिचिदिएँ ।

पर पर हुँदै प्लेन अदृश्य भएपछि जँगलतिर यौटा सुकेको रुखमा चिल बसेको देखेँ । बिस्तारै अघि बढ्दै त्यस्को पनि फोटो खिचेँ । मैले फोटो खिचेको थाहा पाएझैं उसलाई भने त्यै बखत बिष्ट्याउनु पर्ने ।

थप फोटो खिच्दै गर्दा थाहा पाएर उड्यो चिल पनि ।

थप यो फोटो

र यो चैं हिँजो देखिएको एँकरेज डाउनटाउन

Seward यात्राकै थप तस्विरहरु

2009-06-08T02:12:00.000-07:00

यसपटक पनि सिवर्ड यात्राकै केहि (निक्कै) तस्विरहरु राखेको छु । निक्कै नै खिचिएछ । कुनै पनि फाल्न मन नलाग्ने र ब्लगमा हाल्न पनि पगितो नै हुने त्यसैले छानछुन पारेर यति राख्दा पनि अझै सकिएको छैन । अर्को एकपल्टलाई पनि यहि यात्राकै फोटोहरु राख्नुपर्ने भयो । अलिपछि राख्ने विचार गरेको छु । अहिलेलाई प्रसान्त महासागरमा हेलिँदै र हल्लिँदै खिचेका तस्विरहरु -

Valdez घुम्न जाँदाका तस्विरहरु

2009-06-07T03:41:00.000-07:00

यसपटक अघिल्लो साता Valdez घुम्न जाँदाका तस्विरहरु राख्न गै रहेको छु । एँकरेज(म बसेको सहर) बाट ३००६ माईल टाढा उत्तर तर्फ रहेको यो सानो सुन्दर बजारमा जाने मौका सुनिल पन्थी भाईसँग मिलेको थियो । त्यसो त अलास्कामा जता गयो उतै हिमालहरु मात्रै , पहाडहरु मात्रै छ । यहाँ खिचेका फोटोहरु प्राय सबै नै उस्तै लाग्लान् तर सौंदर्य भन्ने कुरा चार कदम पर सरेर हेर्दा फरक देखिन्छ भन्ने मान्यता राख्ने भएकोले मैले धक नमानी राखेको छु फोटोहरु । हेर्नुहोस् तपाईंलाई पनि मनपर्न सक्ला ।

सिवर्ड यात्राका थप तस्विरहरु

2009-05-29T10:10:00.001-07:00

Seward Trip मा जाँदा एँकरेज देखि Seward पुगुञ्जेलसम्म कुदिरहेको रेलबाट खिचेका केहि (निक्कै थिए) फोटोहरु अघिल्लो पोष्टमा राखिसकेको हुँ । यसपटक Seward पुगिसकेपछि क्रुजमा हल्लिँदै खिचेका केहि(यो पनि निक्कै नै छ) फोटोहरु राखेको छु । अझै निक्कै धेरै फोटोहरु छन् सबैलाई क्रमश राख्दै जाने सोचाईमा छु ।

सिवर्ड यात्रा

2009-05-27T00:45:00.000-07:00

मेमोरियल डे साँच्चै मेमोरेबल रहयो यो पाली , जान मन लागेको ठाउँमा जान मन लागेकै तरिकाले जान पाउँदा निक्कै खुशी पनि भएँ । एँकरेजदेखि सिवर्डसम्मको रेल यात्रा र सिवर्डमा ६ घण्टाको क्रुज जाँदा भोक तिर्खै बिर्सिएको थिएँ ( ट्रेनमा अनि क्रुजमा पनि टन्न खाएकोले होला ) । त्यसबेला खिचेका तस्विरहरु मध्ये यस पोष्टमा एँकरेज रेल स्टेशनमा पुगेपछि खिच्न शुरु गरेर सिवर्डमा उत्रिउञ्जेलसम्मका फोटोहरु राखेको छु । रेल यात्रा ( ५ . ३० घण्टा अवधीको ) भरी बस्नु पर्ने सिटमा नबसेर दुई वटा डब्बाको जोडिने भाग जहाँ फोटो खिच्नलाई ओपन स्पेस पनि पाइन्थ्यो र रेलले झैं आफुले पनि मन लागेको बेला धुँवा उडाउन पाईन्थ्यो , मा उभिएको थिएँ म । त्याँहा हावाले हानेर बिरामी बनाएको अझै ठिक भै सकेको छैन । आउनुस् तस्विरमा तपाईंलाई पनि सिवर्ड तिर लैजान्छु - बाटोमा के के देखिन्छ देखाउँदै ।

माछा त हैन निगुरो पो मारियो

2009-05-24T20:28:00.000-07:00

पहिले लोकेशनको बारेमा गफ दि'हालौं क्यार -

ट्रामले पुर्याउने ठाउँ २,३०० फिट उचाईमा रहेको छ ।

ट्राम : माथी हिमालको टुप्पातिर जाने

अलियास्का रिसोर्ट : यसैको वरपर थियो हाम्रो गन्तब्य

गाउँमा हल्ला चल्यो लौ आज माछा मार्न जाने भनेर । नेट लिएर जाने , खोलामा नेट डुबाएर उठाउँदा थाम्नै नसक्ने गरेर माछा आउँछ भने ।

अहो ! रमाईलो पो हुने रहेछ त लौ म पनि जानु पर्यो भनेर क्यामेराको झोला बोकेर निस्किएँ । माछा मार्न जाने जति सबै भेलाहुने टुँगो गरिएको घरमा पुगेपछि थाहा भयो जाने त माछा मार्न हैन रहेछ बरु जँगलतिर निगुरो टिप्न पो रहेछ । एकछिन अचम्ममा परेँ - निगुरो टिप्न पनि पाईन्छ र यतातिर ? तर पाईंदो रहेछ नि - हामी नेपाली न पर्यौं यो अलास्काको जँगलको निगुरोले पनि शान्ती नपाउंने भयो यस्तै सोच्दै बाटो लाग्यौं । पहिले नै गै सकेको अलियास्का रिसोर्ट वरपरको हिंड्ने गोरेटोतिर पाईने रहेछ निगुरो । मैले त टिपिनँ तर सँगै गएका दिदी आमाहरुले टिप्नुभयो । पहिले पनि एकपल्ट माछा मार्न कस्सिएर गएर माछा नमारी फर्केर आएको म यो पाली चैं अरुले माछा मारेको फोटो खिच्नु पर्यो भनेर हिँडेको थिएँ त्यो पनि भएन । त्यतिमात्रै कहाँ र निस्किने बेलामा फेसबूकमा क्यामेरा बोकेर माछा मार्न हिँडेको है भनेर पनि खबर छोडिराखेर हिँडेको । खै माछा चैं कहिले मार्ने हो कुन्नि ? यो पल्टलाई निगुरो मारेको फोटोहरु खिचेँ ।

यहाँका मान्छेहरु हिंड्ने ट्रेल बाहेक अन्तबाट हिंड्यो भने त पलाउँदै गरेका बोटबिरुवा मर्छ भन्छन् । हामीले चैं अटेरी भएर नै निगुरो मार्यौं भन्नु पर्ला - मान्छेहरुले के भन्लान् भन्ने कुरी कुरी पनि लाग्यो ।

हाम्रो निगुरे टिम

ए ! आमाले त टन्नै टिप्नुभएछ

ए दिदी छिटो गर्नुस् है - मान्छेहरुले के भन्लान् ।

अब त पुग्यो आमा नटिप्नुस्

यहि मौकामा बाटोमा यौटा फूलहरुको नर्सरीमा पनि पसिएको थियो । दिदीहरुलाई सयपत्री फूल चाहिएर । त्याँहा पनि केहि फोटोहरु खिचेको थिएँ ।

अब नर्सरीका केहि मिठा तस्विरहरु -

फूलकै घडी बनाएको रहेछ यहाँ चैं । ( फोटोहरु अपलोड गर्न सजिलो र छिटो होला भनेर मिडियम साईजमा अपलोड गरेको छु - कुनै पनि फोटोलाई ठुलो पारेर हेर्न मन लागे डबल क्लिक गरेर ठुलो बनाई हेर्न सक्नुहुन्छ । )

हिमाली

उत्सव तामाङ

आजपनि सूर्यास्त

2009-05-01T00:25:00.000-07:00

हिँजो चित्तै नबुझेर हो आज पनि सूर्यास्त हेर्न र तस्विर खिच्न गएको । हवाईमा बस्दा सूर्यास्तका तस्विरहरु निक्कै खिचेको थिएँ । साह्रै आनन्द लाग्छ सूर्यास्तका तस्विरहरु खिच्दा त्यसैले आज फरक स्थानमा गएर सुर्यास्तको केहि तस्विरहरु खिचेर मन खुशी पारें ।

यताउताका तस्विरहरु

2009-04-30T10:08:00.000-07:00

दिनदिनै दिन लम्बिईरहेको छ । केहिदिन अघिसम्म ७ बज्दा रात भैसक्ने दिन यतिबेला १० बज्दा भर्खर सूर्य अस्ताउने तरखरमा हुन्छ । यो क्रम यो समर(ग्रिष्म काल)भरी नै चल्दै जान्छ र राती नै हुन छोड्छ (?)। दिन लम्बिएको फाईदा भने रात अबेर फुर्सद पाउँदा पनि सूर्यास्त हेर्न भ्याईने रहेछ । आज मैले पनि केहि सूर्यास्तका तस्विर खिच्न भ्याएँ । साथमा बाटोमा परेको एँकरेज ईन्टरनेशनल एयरपोर्टमा खर्किएका केहि प्लेनको र एँकरेज डाउनटाउनको पनि तस्विरहरु छन् ।

हिमाल खोज्दै डेनाली पुग्दा

2009-04-19T22:55:00.000-07:00

डेनाली नेशनल पार्क - अलास्कामा समरको बेला घुम्ने यौटा गतिलो ठाउँ , जहाँ मान्छेहरु नर्थ अमेरिका कन्टिनेन्टकै सबैभन्दा अग्लो हिमाल Mt. McKinley हेर्न जाने गर्छन् । यसको उचाई ६१९४ मिटर (२०३२० फीट) रहेको छ । यतिबेला त्यो नेशनल पार्क खुल्ने बेला भैसकेको छैन तथापि मान्छेहरु त्यता घुम्न जाने भने गर्छन् त्यसैले मैले पनि जहाँसम्म बाटो बन्द छैन त्याँहासम्म जाने सल्लाह गरेको थिएँ यौटा साथीसँग त्यसैले बिहानै उठेर लागियो डेनालीतिर । आफ्नो ध्यान भने Mt. McKinley कै फोटो खिच्ने थियो तर McKinley भएकै ठाउँमा डम्म तुँवालो लागेको भएर दर्शन धरी पाईएन । यहि त हो त्यो दर्शन सम्म नपाएको हिमाल । अहिलेलाई गुगलमा खोजेरै भएपनि राखेको छु यस्को फोटो । पखोस् न यस्लाई अलिपछि गएर दिक्क लाग्ने गरेर फोटो खिचिदिन्छु ।
यो चैं म है जाँदा बाटोमा आफ्नो पनि यौटा खिचाएको नि ।

म्याकिन्लेको दर्शन नपाए पनि अरु 'छ्या!! किन्ले' हरुको भने खिचेँ फोटो । अबका फोटोहरु चैं सबै मैले खिचेको है । ( त्यसैले नराम्रो आएछ रे ?)

हिमाली चरो (नाम चैं Plarmigan भन्दारछन् ) ।

नदी ( बल्ल हिउँ मुन्तिर देखिंन थालेछ ) ।

बादल

एस्किमो ( अलास्काका आदिवासी ) हरुको बस्ने हिउँको घर , यस्लाई Igloo भन्दारा'न् अनि यो चैं संसारकै सबैभन्दा ठुलो Igloo रे !

केहि फूल र पातहरु

2009-01-09T04:29:00.000-08:00

समरमा अलास्काको कुनै पार्क

2008-09-17T00:13:00.000-07:00

गत जुलाईकै कुनै एकदिन म यो रमाईलो ठाउँको आनन्द लिन पुगेको थिएँ । यो कुनै खास रमाईलो ठाउँ अर्थात प्रख्यात ठाउँ नभएर म बसेकै नजिकको यौटा पार्क हो । यहाँबाट माथी माथीसम्म हाईक गर्दै जँगली भालु हेर्न जान्छन् मान्छेहरु ।
फोटो ब्लगलाई हेला गरेझैं अलपत्रै छाडेको निक्कै भै सकेछ त्यसैले चलाउँदैछु भन्ने जनाउ दिनलाई मात्रै यि दुईफोटोहरु राखेको हुँ । यतिबेला मैले चलाईरहेको कम्प्युटरमा फोटो अपलोड गर्न अलि समस्या भैरहेकोले निक्कै फोटोहरु यो ब्लग मार्फत बाँड्न बाँकी नै छ ।

विश्व फोटोग्राफी दिवस आज

2008-08-19T16:32:00.000-07:00

सन् १८३९ मा फ्रान्स सरकारले डेगोरियल र निप्पन जोसेपलाई फोटोग्राफी प्रविधि र्सार्वजनिक गर्न अनुमति दिएको खुशीयालीमा विश्वमा मनाउन थालिएको विश्व फोटोग्राफी दिवस आज १६९ औं वर्षमा प्रवेश भएछ । फोटोग्राफीमै पुर्ण रुपमा समर्पित हुनेहरुको यो पुण्य अवसरमा मैले पनि आफ्नो फोटो ब्लग सुम्सुम्याउने विचार गरें र आजबाट ब्लगको नाम परिवर्तन गरेर 'तस्विरमा जीवन र जगत' राखें । आज आफ्नो फुर्सद नभएकोले कतै तस्विर खिच्न जान सकिनं तर आफुसंग भएको क्यामरालाई पनि यसो सुम्सुम्याएर भने हेरें । जे सुकै भएपनि तस्विर खिचेर ब्लगमा हालुँ कि भन्ने नलागेको पनि हैन तर फेरी कुनै पनि पुरानै एउटा दुईटा तस्विर हाल्नुपर्यो भन्ने विचार आयो र यि तस्विरहरु राख्दैछु ।

माछा मार्न जाँदाका तस्विरहरु

2008-08-13T00:19:00.000-07:00

अस्ति सोमबार ११ तारिख म बल्छि खेल्न जाँदा खिचेको केहि तस्विरहरु आज यहाँ राख्दैछु । माछा मार्न त गएँ तर यौटापनि मार्न सकिनं । पहिले यो खोलामा माछा मार्न गएका थियौं । यहाँ सिल्भर साल्मन पाईने भएपनि मैले त मार्न सकिनं ।

बरु यहाँ सि गलले पो मार्दैथिए माछा ।

त्यसपछि यो अर्को खोलामा गएका थियौं । त्याँहा थुप्रै मान्छेहरु माछा मार्दै थिए । मैले यहाँ पनि मार्न सकिनं ।

यो चाहीँ बल्छि समाएको मेरो हात । अरुलाई ऐ मेरो फोटो खिच् खिच् भन्न पनि मन् लागेन त्यसैले आफैंले बल्छि समएको हात खिचेको ।

माछा मार्न खोला तिर जाँदा खोला नजिकै भएका फाट्टफुट्ट घरको छेउमा यौटा चौरमा दुईजना बच्चाहरु खेल्दैथिए , हेर्दै नेपाली बच्चा जस्ता देखिने उनिहरु संग म केहिबेर बसेर गफ गरें मैले लगेको खाजा उनिहरु संग बाँडेर खाएं अनि उनिहरुको तस्विर पनि खिचें । दुबै बच्चाहरु साह्रै मिजासिला र गफ गर्ने खालका थिए ।

भिक्टोरिया नाम गरेकि ६ बर्षकि बच्ची ।

र यि किला नाम गरेकि ८ वर्षकि भिक्टोरियाकि दिदी ।

हवाईकै थप केहि तस्विरहरु

2008-07-04T18:29:00.000-07:00

भोली जुलाई ५ तारिख साँझ ५ . ५५ बजे म हवाई छाड्दैछु त्यसो त माउईबाट ५ . ५५ मा हवाईयन एयरलाईन्सबाट उडेर होनोलुलु झर्नुपर्ने हुन्छ मैले र राती ९ बजेतिर त्याहाँबाट अलास्का एयरलाईन्स चढेपछि भने हवाईलाई छाड्नेछु । हवाईसंगको सामिप्यता अब म सम्झनामा पोको पारेर लाँदैछु र अलास्कासंग नयाँ सम्बन्ध जोड्न जाँदैछु । त्यसैले अहिले ब्लगमा हवाईको सम्झना थप्दैछु । आउनुहोस् हेरौं माउईबाट होनोलुलुसम्म पानी जहाजबाट यात्रा गर्दा खिचेका केहि तस्विरहरु -

हवाईको सौंदर्य

2008-07-02T17:19:00.002-07:00

हवाईको सौंदर्य भन्दै हवाईका तस्विरहरु राख्ने गरेको थिएं मैले । त्यो क्रम रोकियो र ठाउं अनुशार पोष्टको शिर्षक दिन थालें तर यसपटक भने हवाईको सौंदर्य नै भनेर राखेको छु - यो अचम्म छ , आगो अझ ज्वालामुखी फुटेको कुरालाई सौंदर्यमा गनेको छु मैलेपनि यसलाई सौंदर्य भनेरै पर्यटकहरु यहाँ जाने गर्छन । यसपटक क्षेत्रफलको हिसाबमा हवाईकै सबैभन्दा ठुलो टापु BIG ISLAND, जहाँ अझै पनि सक्रिय ज्वालामुखि रहेको छ , का केहि तस्विरहरु राखेको छु । यि सबै तस्विरहरु साथी मेलिशाले दिएकि हुन ।

ह्यापी बर्थ डे टु मी

2008-05-24T05:39:00.000-07:00

तपाईँलाई त ढाँटुला रे मैले आफैंलाई कसरी ढाँट्नु हौ ? यो तस्विर दुई वर्ष अगाडी ३० औं जन्मदिवस मनाउंदाको हो । यसपाली बत्तिसौं जन्मदिनमा केक त काटें तर यति अप्रत्यासित रुपमा भयो कि तस्विर खिच्ने मौकै परेन अत अहिले यो पुरानो तस्विर भएपनि ब्लगमा राख्दैछु म यो तस्विरमा देखिएको भन्दा २ वर्ष पुरानो भै सकें है ।